Norwegian Travel Hub - KI og ny teknologi i reiselivet

Norwegian Travel Hub (NTH) er eit nasjonalt utviklingsprosjekt for å styrkje norsk reiseliv i møte med kunstig intelligens og ny teknologi. Satsinga er leia av Nettverket for Destinasjonsleiing og Berekraftig Reisemålsutvikling (NDBR), og skjer i samarbeid med EDIH Oceanopolis. Prosjektet har som mål å sikre at reisemål og reiselivsbedrifter eig og styrer utviklinga av sin eigen digitale framtid, og at teknologisk innovasjon skjer i tråd med berekraftige og etiske prinsipp.

Bakgrunnen for initiativet er den raske utviklinga innan kunstig intelligens, der stadig fleire gjester bestiller, søkjer og får anbefalingar direkte gjennom globale plattformer. Dette fører til at eigarskap til kundedata, synlegheit og verdiskaping gradvis glir vekk frå lokale aktørar. Norwegian Travel Hub skal bidra til å snu denne utviklinga ved å gje reisemåla kunnskap, verktøy og struktur for å ta kontrollen tilbake – og bruke teknologien som ein reiskap for verdiskaping, betre gjesteopplevingar og berekraftig besøksforvaltning.

Gjennom prosjektet blir det utvikla ein modell for korleis reisemål og bedrifter kan eige sine eigne data, bygge felles digitale strukturar og utnytte kunstig intelligens på ein måte som fremjar lokal verdiskaping, besøksstyring og klimaomsyn. Arbeidet skjer i tett samarbeid med EDIH Oceanopolis, eit EU-støtta digitaliseringssenter med ekspertise innan kunstig intelligens og datadeling, som bidreg med teknisk rettleiing, fagdager og konseptutvikling.

Hovudleveransar i satsinga

• Utvikling av ein felles digital kunnskapsplattform, der data og innsikt frå berekraftige reisemål kan samlast, delast og analyserast ved hjelp av KI for betre beslutningsstøtte.
• Utarbeiding av ein modell for eigarskap og datadeling, som sikrar at reisemål sjølv kontrollerer informasjon, distribusjon og synlegheit.
• Felles metodikk og læringsløp for digital kompetanseheving og bruk av KI i marknadsføring, besøksstyring og berekraftarbeid.
• Case- og prototypeutvikling i samarbeid med utvalde reisemål, med testing av konkrete KI-løysingar i praksis.
• Etablering av ein nasjonal arena for kunnskapsdeling og vidare samarbeid mellom reiseliv og teknologimiljø.

Prosjektet blir gjennomført i tre fasar frå hausten 2025 til våren 2026: først kartlegging og kompetansebygging, deretter utprøving og testing av KI-konsept, og til slutt skalering og vidareføring gjennom etablering av varige strukturar for samarbeid og drift.

‍