I 2022 tok Næringshagen i Ryfylke initiativ til å starte eit nasjonalt nettverk for destinasjonsselskap og utviklingsaktørar som er ansvarlege for arbeidet med “Berekraftig Reisemål”-ordninga i sine regionar. Ordninga, som blir drifta av Innovasjon Noreg Reiseliv, er den einaste nasjonale rammeordninga som gir reisemål konkrete verktøy og indikatorar for å sikre ei berekraftig og heilskapleg utvikling av norsk reiseliv.
Bak initiativet ligg eit ønske om å styrkje erfaringsdeling, kunnskapsoverføring og samarbeid mellom reisemål som sit tett på utviklingsprosessane lokalt. Målet er at destinasjonane skal kunne jobbe smartare, spare ressursar og utvikle seg meir effektivt gjennom felles løft, deling av verktøy og tettare koordinering.
I dag består nettverket av over 50 reisemål, som til saman dekker meir enn 150 kommunar og representerer over 5000 medlemsbedrifter over heile landet. Dette gjer NDBR til det største faglege samarbeidet innan berekraftig reisemålsutvikling i Noreg.
Gjennom nettverket er det etablert fleire felles satsingar og møteplassar som skal løfte berekraftarbeidet vidare:
- AccessNorway – eit nasjonalt initiativ for tilgjengeleg reiseliv, med mål om å gjere norske reisemål meir inkluderande for alle.
- Tiltak retta mot auka campingturisme – samarbeid om kunnskapsdeling og gode løysingar for korleis ein styrkjer moglegheiter og avgrenser utfordringar knytt til meir campingtrafikk på norske vegar og reisemål.
- KI og ny teknologi – ei felles satsing på korleis kunstig intelligens og digitale verktøy kan nyttast i reiselivet for betre drift, formidling og besøksforvaltning.
- Kommunikasjonsløftet – utvikling av felles retningslinjer for ansvarleg kommunikasjon.
- Berekraftskaffi – ein månadleg digital møteplass for deling av erfaringar, inspirasjon og fagleg påfyll.
- Vertskommunen – ein nasjonal digital konferanse som samlar destinasjonsleiingar frå heile landet til dialog om felles utfordringar og løysingar.
- BerekraftsAkademiet – eit felles kurs- og kompetansetilbod for deltakarane i nettverket, med modular innan tilgjengeleg reiseliv, vertskap, norsk natur og kultur.
Gjennom NDBR har reisemåla fått ein felles arena for å utvikle kunnskap og løysingar som styrkjer norsk reiseliv i møte med framtidas krav. Nnasjonalt bedriftsnettverk støtta av Innovasjon Norge for perioden 2024–2026, og blir utvikla i tett samarbeid med Innovasjon Noreg Reiseliv og Visit Norway.
